想有覺好瞓？臨瞓前避免以下四種食物

返工咁辛苦，緊係要食餐好黎慰勞自己。但原來以下呢幾樣食物，隨時會令你無覺好瞓。跟據外國網站《OBSERVER》一篇有關四種食物影響睡眠質素嘅文章，作者Dr. Josh Axe就指出酒精、高糖份食物、辛辣食物同埋油膩食物都會令睡眠質素下降。

1. 酒精 好多人臨瞓前都有飲酒嘅習慣，希望好瞓啲。但原來同事實相反，研究顯示酒精會破壞速動眼期睡眠（REM），變得易嬲同心神不定。同時酒精亦會影響呼吸，加劇睡眠窒息症嘅問題。

2. 高糖份食物 甜品向來都係好多人嘅好朋友，但係高糖份食物唔單止會令血糖升高，原來褪黑激素（melatonin）都會減少釋放，影響生理時鐘。

3. 辛辣食物 相信大家身邊總有個無辣不歡嘅朋友吧！咁你就要提提佢避免喺臨瞓前食喇。因為辛辣食物容易導致消化不良，加上辣椒素（capsaicin）會令體溫上升，自然瞓得無咁好。

4. 油膩食物 薯條、Pizza等等嘅煎炸食物一向令人難以抗拒，就算明知會增加心血管疾病嘅風險，都唔會減少對佢地嘅喜愛。但如果你成日都瞓得唔好，就要忍口喇！根據研究發現，含有飽和脂肪酸嘅食品與修復性睡眠嘅減少有直接關係，半夜更容易驚醒。

如果大家想瞓得好，最好喺瞓覺前幾個鐘避免食以上嘅食物喇！

資料來源

#睡眠質素